Txillardegi
Idazlea.

Nondik nora nik Jokin Leniz arkitekto-artistaren aurkezpena egingo ?
Oso harrigarria da, bai. Ez bainaiz ni inor artearen alorrean ezer esateko. Eta inkurtsio bitxi honetaz lerro labur batzuk bederen esatea beharrezko iruditu zait.

Bilbotarra jatorriz ( 1943 ) , Venezuelan urte luzetan egondakoa, euskara oraingoz osotara ez menderaturik amorratuta bizi den euskaltzalea (beste bat! ), artista langile saiatu bat topatu nuen.

Berehalatik bere obra osoaren bilduma eder bat eskaini zidan kartoi finezko orri ederretara bildua. Lan gaitza, kontuz, begirunez, poliki-poliki mamitua.
Ez ditu Jokinek bihotz osoaz Gipuzkoako itsasargien multzoa bakarrik landu. Ez. Lumaxkaren teknikaz ezin hobeki baliaturik, Donostia osoa dastatzeko aukera eman digu hamaika marrazkitan : kaia, Bulebarra ( gaurko bere horretan ), San Bartolome muino eta komentu famatua, Udaletxea ,Konstituzio enparantza …

Askotan oso ikusmolde originaletatik begiraturik berrikusten ditugu hor ohiko geure inguruak . San Bizente elizatik aurkezten digun San Telmoren etxaurrea, adibidez, oso ederki hautatua izan da .Venezuelako obra ez dut ongi ezagutzen. Baina Euskal Herriko lanak , Donostiatik at mamitutakoak barne, badu Jokinen bilduman marrazki ederrik . Dena beti bero eta maitagunez oraturik, hor ditugu Leintz-ko Gatzaga ( atabismoak eraginik ote aukeratua ? ), Orexa-ko txokoak behin eta berriz, Nafarroako Eunateko elizatxo zortzikun bikaina .... Eta abar luze bat.

Jokin Lenizek , hitz batez, lekuko fin eta zehatz, benetako altxor bat utzi digu gaurko eta biharko euskaldunoi .
Eta denon esker ona merezi du .